SHILLONG: Budbar salo konta 10-na curfew-ko ra·galatanio maming so·sojengjeng ong·anirang dongdapjahani gimin Bristibar saloba curfew-ko pring 5:00 bajioni attam 5:00 bajiona ra·galatangkuna sorkari tik ka·angaha.
East Khasi Hills a·jani Deputy Commissioner Isawanda Laloo-ni u·iatani gitade, curfew-ko dontongatengmiting somoirango manderang jinma tom·bimongna ba jinma re·jomanirangko dakna man·jawa indiba dokkanrangko attam 4:00 bajiona kulina man·gen.
Office-rangko aro gipin institution-rangkoba attam 4:00 bajiona kulina man·gen ine u·iataha.
Bristibar attam 5:00 bajionide curfew-ko ra·gattaiengahani gimin attam 5:00 bajini ja·mande manderang aro garirang re·rurana man·jawaha aro dokkan, office aro uandakgipa pilak biaprangkon chipe dontokna nanggnok ine Deputy Commissioner u·iataha.
