SHILLONG: Hynniewtrep National Liberation Council (HNLC)-ni gitcham general secretary Cheristerfield Thangkhiew-ko police-rangni so·otani bidingo judicial inquiry-ko dakatna gita sorkari manchiangahaon, ia judicial inquiry-ko Mawlai jolo songdongenggipa manderang ra·chakna jechakangskaenba, inquiry-ko dakna gita National Human Rights Commission (NHRC)-na pakwatskachina dabiangtokaha.
Iani bidingo kobor ra·timgipa manderang baksa agangrikengon, Mawlai jolo songdongenggipa manderang judicial inquiry-ko ka·dongchakna man·jaengahani gimin ia a·selni bidingo inquiry-ko dakna gita sorkari, NHRC-na pakwatskana nanga ine Mawlai Town Dorbar (MTD)-ni coordinator Herlambok War parakataha.
“Chingni jong-ada Cheristerfield Thangkhiew-ko so·otani bidingo NHRC-sa maming mikkang niteani gri inquiry-ko dakna man·gen ine chinga ka·dongenga,” ine MTD-ni coordinator aro Mawlai Iewrynghep-ni Rangbah Shnong parakataha.
Sorkarini songe on·gipa peace committee-o Mawlai-ni manderang maming dakeba bakrimna man·jawa ine talataniko on·angengon, Thangkhiew-ko so·otgalanio jak donggipa police-rangko sorkari, kamoniko ra·galchengna nanga ine War dabiangaha.
“Thangkhiew-ko so·otanio jak donggipa sipairangni kosako sorkari, dingtang dingtang niamrango pangchake mokordomako ka·chengna nanggen, unosa chinga peace committee-ni bak ong·pana man·gen,” ine ua parakataha.