Haryana-o sianggipa A·chik sakgnini bidingo JAC, Rijiju-na memo on·a

TURA: Adita salrangna skang, Haryana a·dokni hospital aro Delhi-ni hotel-o ong·na kragija bewalo sianggipa A·chik chadambe sakgnina kakket bichalko on·china didie Budbar salo, Garo Hills-ni dingtang dingtang dolrangni nangrime bikotskagipa All Garo Hills Joint Action Committee (AGHJAC), ma·mongni Union Law & Justice Minister Kiren Rijiju-na, New Delhi-ni 9 Krishnamenon Marg-o donggipa uni noko memorandum-ko on·angaha.
Ia a·selni bidingo Union Minister-na sedoatengon, Haryana a·dokni hospital-o aro Delhi-ni hotel-o sianggipa Rosy Sangma aro Samuel Sangma-ni nokdangna kakket bichalko on·na man·na gita ta·raken inquiry-ko dakatna nangenga ine AGHJAC parakataha.
“Ia a·selni bidingo kakketko ma·sina man·na gita chinga Central Investigation Agency (CIA)-rangchi am·sandianirangko dakatchina Union Law & Justice Minister-ko didienga,” ine AGHJAC-ni convenor Balkarin Ch Marak parakataha.
AGHJAC-ni parakatani gitade, Union Minister Kiren Rijiju-na memorandum-ko on·eani somoio Shillong-ni MP Vincent H Pala-ba uamang baksa dongpaaha.
Ia memorandum-ni copy-ko Meghalaya a·dokni Chief Minister Conrad K Sangma-naba on·ataha aro ia apsan copy-kon Opposition dolni dilgipa Mukul Sangma, Tura-ni MP Agatha K Sangma aro MLA Zenith Sangma-na on·atgen ineba AGHJAC parakataha.
Union Law & Justice Minister Kiren Rijiju-ko grongenio dongpae bakko ra·anggipa AGHJAC-ni membor-rangara, AGHJAC-ni adviser Roger Benny A Sangma, AGHJAC-ni convenor Balkarin Ch Marak, GSU Eastern Zone-ni president Saljrang Tengrik R Marak, GSU HQ-ni president Zikku Balgra N Marak, GSMC Garobadha unit-ni chairman Ryan Ch Marak, GSU northern zone-ni general secretary Walseng N Sangma, FAF North Garo Hill-ni president Jagir M Sangma, GSU Western Zone-ni president Tengsan M Marak, GSU Chibinang unit-ni general secretary Kengkrong B Sangma aro Delhi A·chik Youth Association (DAYA)-ni adviser Michael Sangma ong·achim.