SHILLONG: Meghalaya Legislative Assembly-ni Autumn Session-ko re·baenggipa September 10 tarikoni a·bachengatenba September 17 tariko matchotatgen ine Bristibar salo, Meghalaya Legislative Assembly-ni Speaker Metbah Lyngdoh parakataha.
Bristibar salo Assembly Speaker Metbah Lyngdoh-ni dilanichi Business Advisory Committee-ni tom·aniko ong·atangenba, ia Autumn Session-na tarisogimin calendar-ko ra·chakangaha.
Ia Committee-ni tom·anio a·dokni Deputy Chief Minister aro Parliamentary Affairs Minister Prestone Tynsong baksana, Opposition dolni dilgipa Mukul Sangma, Opposition dolni membor Ampareen Lyngdoh aro sorkariko chalaienggipa dolni membor Balajied Kupar Synrem-ba dongpae bak ra·angaha.
Ia Autumn Session-o gimik saldok kam ka·ani salrang donggen, jeon government business-na salgittamprak ka·e aro private member’s business-na salbriko suale donangaha.