SHILLONG: Sukrobar pringwalni 1:10 bajimango, Ri Bhoi a·jani Byrnihat-o re·ruraenggipa garirangko nirokengmiting somoio Assam-ni gari bolsaoniko gopretna jakkalgipa adita bosturangko man·aha.
Gopretna jakkalgipa bosturangko police-rang, AS-01BV 8065 garioniko man·aha aro ia garioniko man·gipa bosturangara ge 2044 aluminium Instantaneous Electric Detonator Class-6 (Division-3) aro ge 4027 Neo Gel (Gelatine Stick)-rang ong·achim.
Ia bosturangko man·ani ja·man police-rang, ia garini driver Moynul Hoque minggipa mandeko rim·aha. Rim·ako man·gipa mandeara Assam a·dokni Kamrup a·jani ning·o donggipa Rangaswari songoni ong·achim.
Police-rangni u·iatani gitade, ia rama gita gopretna jakkalgipa bosturangko sale gari bolsa re·pakangna sienga ine koborko man·soani ja·man police-rang, Byrnihat Police Outpost-ni sambao donggipa National Highway-o nirikkianirangko daksoenba, ia gariko rim·sona man·aha.
Ia gari, East Jaintia Hills a·jani Khliehriat-oni re·baengachim aro Assam-ni Athiabari-ona re·angengachim ineba kobor on·aha.
Iani bidingo police-rang, ning·tue sandianirangko dakengkua ineba police-rang u·iataha.
