TURA: Re·anggipa Bristibar salo, North Garo Hills a·jani Dainadubi jolo donggipa dingtang dingtang dolrang, chong·motan GSU, GSMC, AAYF, AHAM, PJAC, DCYO, AGPF aro NGHPWO dolrang, North Garo Hills a·jani Deputy Commissioner-ko grongenba, Kharkutta-ona dakanggipa Gairong dolongko taridape on·china didiangaha.
NGO-rangni parakatani gitade, ia Gairong dolongara jolo songdongenggipa manderangna mongsonggipa re·a doani chol gita ong·engachim indiba da·o ia dolongni obosta namsrangjaengahani a·sel gari gorarang ia dolong gita re·na man·jaengahachim.
Ia dolong namjahani gimin manderang re·rurana man·na gita sub-way-ko tariskaahachim indiba ia sub-way-ba da·o mikkarang waani a·sel nosto ong·atako man·aha ineba NGO-rang parakataha.
“Ia Gairong dolong da·o be·na siengaha aro ia dolong be·ahaoba Kharkutta jolrangona re·rurana nangenggipa manderang bang·a neng·nikanirangko chagrongna nanggnok,” ine NGO-rang, ia dolongko ta·raken tarichina aro dolongko matchotkujaskal sub-way-ko tarie on·skachina sorkariko didiataha.
Iani bidingo jolni NGO-rang, a·dokni Chief Minister-naba u·iatmanahachim indiba da·o dipet ua mamingkoba aganchaka dongkujaenga ineba NGO-rang parakataha.
