SHILLONG: Meghalaya a·dokni gitcham minister AL Hek, da·o Chief Minister-ni adviser ong·e kamko ka·skaengahani gimin, kamtangko gisik nange aro gisik gnanggipa ong·e ka·china a·dokni Chief Minister Conrad K Sangma didiangaha.
Re·anggipa August-ni 13 tariko HNLC-ni gitcham general secretary Cheristerfield Thangkhiew-ko police-rangni so·ote galani ja·man Hek, a·dok sorkarini kamko matnangatenba, a·dokni Director General of Police (DGP) R Chandranathan-ko kam watchina dabigipani bidingo sing·anina Chief Minister, ia kattarangko aganaha.
“Gitcham minister-ni agangipa kattarangna ango maming aganchakna nangani dongja indiba kattarangara namen ong·na kragijagipa ong·a. BJP dolni ning·on songgigrikgimin gita Shullai-ko uni biapo donatskaani ja·man ua iandakgipa kattarangko sorkarini kosako aganenga,” ine Sangma parakataha.
BJP dolni high command-o songgigrikgimin gita a·dokni MLA-rangna Cabinet-o biapko sualchina agangrikgimin dongani giminsa uni biapo BJP-ni sakgipin MLA Shullai-ko Cabinet-o rimnapskaahachim ineba Chief Minister talataniko on·angaha.
Iandake sorkariko matnanganiranga nama ong·ja ine janapatengon, BJP-ni ning·o meligrikgijanirang dongengode uamang doltangonin namatchina ine Chief Minister aganaha.
“Sorkarini kosako iandake matnanganirang nama ong·ja. Ua (Hek) saksa chief minister-ni adviser ong·a aro ua kamtangko gisiko nange ka·na nanga,” ine Sangma aganaha.
