TURA: Tura-oni Dalu-ona dakanggipa National Highway (NH-51) ramako taria matchotgija donchipengani a·sel ramako re·ruraenggipa manderang neng·nikanirangko chagrongna nangtokengani gimin Sukrobar salo ia ramako adita somoirangna champengataha aro ramako champengatengmiting somoio ramako re·ruraenggipa manderang adita somoirangna ua biapon jachange dongtokna gita nangaha.
Koborko on·ani gitade, Tura-oni Dalu-ona dakanggipa ramako 2018 bilsion tarina a·bachengahaoba da·onan matchotkujaengani a·sel da·o wachini somoirangode ia ramako re·ruraenggipa manderang neng·nikanirangko man·batna nangengachim aro uandaken ia ramako taria matchotgija donchipengani gimin Sukrobar salo jolni manderang aro Gambegre-ni MLA Saleng A Sangma, ramako tarienggipa company-ni kosako suk ong·gijaniko mesokna gita adita somoirangna ia ramako champenge donangaha.
Ja·mano Gambegre-ni MLA Saleng Sangma, West Garo Hills a·jani Deputy Commissioner Ram Singh-ko ua biapona okamatenba, ia ramako tarigija donchipengani gimin sing·sandianirangko dakangaha.
Deputy Commissioner-ni u·iatani gitade, ia ramako minute 15-20-mangna champenge donaha indiba ja·mano garirangko re·rurana on·piltaiaha.
“Ia ramako taria matchotgija donengani gimin engineer-o sing·sandion, Gambegre-ni MLA chu·ongnikaniko man·jae dikdiksana ia ramako champengataha. Ian adita ma·sisretgrikanisan ong·aia aro ja·mano bakan garirangko re·rurana on·piltaiaha,” ine Ram Singh parakataha.
Da·o wachini somoi ong·engani giminsa ramako tarianio neng·nikanirangko man·e kamrangko dontongatchengna nangenga indiba ian NHIDCL-ni a·sel ong·ja ineba Deputy Commissioner talataniko on·angaha.
Ia ramako 2018 bilsion tarina a·bachengahaoba a·arangko ra·anio neng·nikanirangko man·e mongsonggipa kamrangko a·bachengningna man·jaha aro 2019 bilsini bon·angachibarasa kamrangko a·bachengna man·ahachim ine kobor on·timgiparang u·iatskaaha.
