SHILLONG: Adita salrangna skang, HNLC bobil dolni gitcham general secretary Cheristerfield Thangkhiew-ko police-rangni so·otani gimin Shillong songjinmao chadamberangni jegale re·jomaniko Taliban-ni kamrang baksa tosusae aganahani gimin a·dokni NPP aro BJP dolrang, Congress dolko jegalataha.
Re·anggipa Robibar salo, police-rangni silchidareko ra·seke adita sak chadamberangni Shillong ramao silchidare mesoke re·jomaniko, Congress dolni dilgipa Randeep Singh Surjewala, Taliban bobil dolni kamrang baksa tosusae ia kamna BJP dolchi dilenggipa ma·mong sorkariko matnangatahachim ine nikna man·a.
Indake ong·engon, Meghalaya a·dokko aro a·dokni chadamberangko bobil dol baksa aro ‘Taliban’ baksa tosusaahani gimin NPP dolni dilgipa Marcuise Marak, Congress dolko raken jegalataha aro iandakgipa kattarangara a·dokni chadamberangna namen gisik saataniko ra·bana man·gen ine parakataha.
Iandakgipa kattarangko skatang aganrongani a·selan Congress dol, maming niam aro miksongani grigipa dol gitasa ong·rorobaengaha ineba Marak parakataha.
“Meghalaya a·doko tom·tomaniko ra·bapilna gita NPP-chi dilenggipa MDA sorkari, manderang baksa nangrime kamko ka·engon, Congress dolni dilgiparang a·dokni chadamberangko ‘Taliban’ baksa tosusae agananiara namen rasong gribeani ong·aha aro ian Meghalaya a·dokko gipin a·dokrangni mikkango galone aganani gita ong·aha,” ine NPP dolni ku·wattimgipa Marcuise Marak parakataha.
MDA sorkarini somoiona bate Congress sorkarini somoirangon Meghalaya a·doko so·sojengjeng ong·anirang batachim ineba Marak, a·dokni gitcham chief minister aro Congress dolni dilgipa Mukul Sangma-na gisik ra·atpilaniko on·angaha.
“Da·alo an·ching Khasi, Jaintia ba Garo Hills-ni je biaponaba maming kennani grian songre songgabatna man·tokengaha. Chief Minister Conrad K Sangma-ni dilanichi MDA sorkari, a·doko tom·tomaniko ra·bapilna man·aha. Congress sorkarini somoirangko niatpilgenchimode ua somoirango an·ching darangan skatang songre songgabatna aro tom·tome janggi tangna man·jachim ine nikatna man·gen,” ine Marak parakataha.
Meghalaya a·dokni chadamberangko ‘Taliban’ baksa tosusaahani gimin Congress dol, a·dokni manderango kemako bi·na nanga ineba NPP-ni dilgipa dabiangaha.
Apsan daken, a·dokni BJP dolba, Meghalaya a·dokni chadamberangko ‘Taliban’ baksa tosusae aganahani gimin Congress dolni kosako raken jegalataha aro a·doko chadamberang indinan ding·chaoe dongtokengon, ian wa·alo took rudapata gitasa ong·enga ine parakataha.
“Congress dolni somoiosa salgro salaram a·dokrango bobil dake chakatanirang bilakbatachim. Congress dolni somoio ma·mongo aro a·dokoba HNLC bobil dolko tom·tomaona rimbapilna gita maming kamrangkon ka·jaha,” ine BJP national council-ni membor Bashailang Khongwir parakataha.
Adita salrangna skang, Shillong songjinmao so·sojengjeng ong·engmiting somoio police-rangko watatgenchimode so·sojengjeng ong·anirang bilongbatgenchim ineba ua a·dokni Chief Minister Conrad Sangma-ko, ua somoio sipai dolrangko ua biapona watatjahani gimin mittelpile aganangaha.