SHILLONG: East Khasi Hills district police, re·anggipa August 15 tariko a·songni jakgitelani salko gisik ra·e maniani salo adita kajia-golmal ong·angmitingo police-rangni slaiko ma·sina man·gijagipa chadamberangni ra·seke ra·anggipako da·alona kingkingba man·pilkujaenga.
“Chinga, chingni silchi-dareko da·onaba man·pilkujaenga,” ine EKH-ni Superintendent of police, Sylvester Nongtnger mejal Sonibar salo parakaha.
Iani bidingo, mejalo Sonibaro u·ina man·gijagipa manderangni lekka pal·tako see janapatgipako man·soani ja·mano, Nongtnger-ni agan-talatanio janapani gitade, “Chinga ua chittiko man·sokujaenga, indiba anga lekkani bidingo nirikkie ra·aha, aro ua chittio darangba soi ka·jaha,” ineba ua agandapaha.
Indake ong·engon, ua chittiko Mawlai Town Dorbar-na seataha, aro ua apsan chittikon East Khasi Hills SP aro media-rangnaba on·atahachim.
Chittiko seatgipani janapani gitade, ua slaiko adita sak Lawmali jolni chadamberangni jakon ong·a aro uan batanggimin somoio police-rangni jakoniko ra·seke ra·anggipa slaian ong·na nanga ine uamang ma·sina man·aha. Uandake apsan chadamberangan ua slaiko Wahmukhrah chibimako kabatgipa Umpohliew dolongona dipet kebitangahachim ine ua chittio parakataha.
