SHILLONG: East Jaintia Hills-o niamgri coke factory-rangko chalaianiara manderangni an·seng-baljoke donganiko nosto ka·gen ine gitcham Health Minister aro CM-ni Chief Advisor AL Hek, jajrengchakaniko parakaha.
East Jaintia Hills-o donggipa niamgri chalaienggipa coke factory-rangko seachisan chipataigija kamrangkoba bon·atna nanga ineba Hek, Sonibaro aganaha.
“Niamgri chalaienggipa coke factory-rangko chipatna gita sorkarini ja·ku ga·anina anga kusi ong·chaka indiba ian kamchiba ong·na nanga aro ku·rachakmangmange dakna gualaigipa ong·na nangja,” uano chalaienggipa coke factory-rang manderangni an·seng baljokanina neng·nikaniko ra·bagen ine Hek aganaha.
Unbaksana, ia coke factory-rangna jakkalenggipa koelako man·gipani bidingo sandianiko dakani sorkarini dakna nanggni kam ong·a ineba ua aganaha.
Niamgri chalaienggipa coke factory-rangni kosako East Jaintia Hills-ni raken jegalaniko dakenganio a·dokni Chief Minister Conrad Sangma, sorkarini raiko man·gija niamgri nangchongmotgipa lekkarang gri chalaienggipa organization aro company-rangni kosako a·dok sorkari raken ja·ku de·aniko dakgen ine ku·rachakaha.
Unbaksana, Deputy Commissioner Ethelbert Kharmal-ni factory-ni niamgri chalaienggipa coke factory-ko chipchina gita ge·etataniko East Jaintia Hills-o chalaienggipa coke factory-ni nokgiparang manijaha. Indake, District Administration-ni re·anggimin July 15 tariko ge·etataniko manigija dake factory-rangko chalaiengani gimin uni nokgiparangni kosako badi ka·aha.
Badi ka·a man·giparangni factory-rangko Meghalaya State Pollution Control Board (MSPCB)-ba kulichina rai on.a ba Consent To Establish (CTE)-ko on.aniko dakja ine parakataha.
