TURA: Tura jilao songdonggipa manderang pangna bilsirango gita songjinma ba gittimrangona chi sokatna man·jae, mongsongbate ran·kari somoirango nangchongmotgipa kamrangna chi jakkalna man·janichi namen neng·nikaniko chagrongenga ine Cherangre gittimni Shri, Kamkam Momin songdonggipa manderangni neng·nikaniko parakataha.
“Songjinmaona ba gittimrangona chi sokatanirang pangnan apsan apsan ong·enga, indiba uarangko bang·e man·rikjaenganichi noko mande bang·giparangnade chu·ongja aro uandakgipa nokdangrangko neng·nikanirangko chagrongenga,” ine Momin, uni sak 11 nokdangni manderang baksa uamangni neng·nikaniko parakaha.
Uni parakani gitade, Garo Hills-o bilsiantion manderang bang·batrikrikenga, indiba uamangna nangchongmotgipa kamrangko chu·onga gita sokatna man·skakujaenga, ineba ua aganaha.
“Chingni jolrango da·ona kingkingba chu·onga gitan chirangko chu·onga gita watna ba bang·kale ra·chimonge on·a man·kuja. Uarangna agreba, chi salanggipa pipeline nosto ong·e jokrurugalanichi chirangko indin jokgalatenganichi, chu·onga gitan chi chimonge songdonggipa manderangna watatna man·jaenga,” ineba ua aganengon, indakgipa a·sel ba obostarangni a·sel, salgni ba sak gittamrangna skangonin chirangko chu·onge on·a man·kujaenga ineba agandapaha.
Ua gittimo chu man·jaenganichi neng·nikaniko chagrongani bidingo aganengon, uamang salantian chiring ba chibimarangchi au-miksuna somoirangko ra·na nangaha, “ian chingni salantio janggi tanganio altugipa kam ong·ja. Unigimin, chingni somoirangko indin bon·atanisan ong·enga,” ineba Monin parakaha.
Tura jilao chi man·gijanichi songdonggiparang neng·nikaniko chagrongenga
Date:
Share post:
