SHILLONG: Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko police-rangni so·otani bidingo judicial inquiry-ko nama bewalo chu·sokatgen ine so·ota man·gipa mandeni nokdang, ka·dongchakenganiko parakataha.
“Ia a·selni bidingo judicial inquiry-ko dakna sorkari tik ka·ahani gimin chinga ia inquiry-ko nama bewalo chu·sokatna ka·donge inquiry report-na sengenga. Chinga uni nokdangni manderang ong·e kakket bichalna dakgrikgen,” ine so·otgalako man·gipa Cheristerfield-ni jonggipa Granarysterfield Thangkhiew, kobor ra·timgiparangna parakataha.
Ia case-ko jako ra·na gita Meghalaya Human Rights Commission (MHRC)-ba re·baenggipa September 10 tariko tom·na sienga ineba so·ota man·gipa mandeni jonggipa parakataha.
HNLC-ni gitcham dilgipako so·otanio jak donggipa police official-rangko ra·galchina dabitokengon, police official-rangko ra·galchina dabianio uni nokdangde maming bak dongpaja ine Granarysterfield parakatskaaha.
Cheristerfield-ko so·otanio jak donggipa police officer-rangko kam ra·galchina ‘Ka Sur ki Nong Mawlai’ dolni dabienggipani bidingo janapatengon, uamangni dabianio uamangde maming bak dongpaja aro mamingkoba aganna man·jawa ine sianggipa mandeni jonggipa parakataha.
So·sojengjeng ong·anirangko bon·ate tom·tomaniko ra·bapiltaichina gitaba ua Shillong songjinmani manderangko didiataha.