SHILLONG: Opposition dolni dilgipa Dr Mukul Sangma-ni matnange agangipa kattarangna Congress dolni mitam MLA-rang, a·dokni Chief Minister Conrad K Sangma-o kema bi·chakaha ine uni a·kanggipa kattarangko Congress dolni sakgipin MLA Ampareen Lyngdoh jegalatenba, ian ka·dingani kattasa ong·aia ine parakataha.
Chief Minister-ni agangipa kattarangko jegalatengon, Congress dolni badia MLA-rang uo kema bi·aha uko talatchina Lyngdoh, Chief Minister-o dabiangaha.
“Chief Minister-ni a·kangenggipa kattarangara kakket ong·ja inen chinga ma·sienga. Sawa aro badia MLA-rang uo kemako bi·aha hai chingna agan-talate on·bo. Chinga Congress dolni membor-rang pilakan ku·cholsan ong·giparangsa ong·ani gimin CM-ni agangipa kattarangko chinga bebera·na man·jawa,” ine Congress MLA aganaha.
Adita salrangna skang, Congress dolni adita sak MLA-rang una phone ka·ate uo kemako bi·ataha ine Chief Minister Conrad Sangma a·kangatahachim.
Congress dolni mitam dilgiparang kragija kattarangko jakkalengani gimin mitam MLA-rang kratcha·chakpilengaha ineba Sangma parakatahachim.
Indake ong·engon, Meghalaya a·doko ong·enggipa obostarang namjabatroroengani giminsa apsan chanchirimna gita Congress dol, NPP-chi dilenggipa MDA sorkario bakrimenggipa mitam dolrangna seataha ineba Congress dolni MLA Ampareen Lyngdoh talatangaha.
“Ia so·sojengjeng ong·anirang basako namgen chinga ma·sija indiba obostarang bakan namanggen ine chinga ka·dongenga. Meghalaya a·doko mingsani ja·man mingsa a·sel ong·anirangko nikna man·enga aro ian da·o ong·enggipa sorkarini kamtango chu·sokgijaniko mesokani ong·a,” ine Lyngdoh aganaha.
Meghalaya a·doko sorkariko rikna Congress dol sikkelenga ong·ja ineba Lyngdoh talataniko on·angaha.
“Chinga bilna okkrienga ong·ja. Bilsi gittam atana chinga sengaha aro ia term bon·aonaba chinga sengna man·aigen. Kamrangko nambate jako ra·na man·na gitasa chinga gital sorkariko nangengani gimin janapaia,” ine Congress MLA aganaha.
