SHILLONG: Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko police-rangni so·otgalanina ding·chaoe re·anggipa August-ni 15 tariko so·sojengjeng ong·atengmiting somoio police-rangoniko ra·e katgipa INSAS rifle ponggittamko Sombar attamchibara, police-rang Umkhrah chiringoniko man·pilaha.
Ia silchidarerangko adita sak chadamberangni ra·e katani ja·man, sorkarini didiataniko man·e ia silchidarerangko on·pilchina Mawlai jolko dilenggipa manderang, chadamberangko mol·molatahachim ine nikna man·a.
Sorkari aro jolko dilgiparangni mol·molatani ja·man ia silchidarerangko Umkhrah chiringo gale donangaha ine adita salrangna skangsan, ma·sina man·gijagipa manderang chittiko see police-rangna aro Mawlai jolko dilenggipa manderangnaba on·atahachim.
Chittiko man·soani ja·man, Sombar salo Fire & Emergency Service-ni Search & Rescue Team (SRT) aro East Khasi Hills a·jani police-rang, Umkhrah chiringoniko ia silchidarerangko sandina a·bachengaha aro uandaken ia silchidarerangko Sombar salpaksachibara ia chiringonikon man·pilaha.
Ia silchidarerangko sandianio police-rangna dakchakanirangko on·ahani gimin aro chittiko seachi u·iatahani gimin Meghalaya Police, Mawlai jolni dilgiparangko aro chadamberangkoba mittelpilataha.
Koborko on·ani gitade, ia INSAS rifle ponggittamara Mawkynroh outpost-o kam ka·enggipa police-rangni silchidarerang ong·achim aro unsalo ia silchidarerangko gale katahani gimin sorkari, ia police-rangko kam dontongatahachim.
Re·anggipa August-ni 15 tariko, dolsa chadamberang, police-rangni silchidarerangko ra·sekenba, police-rangni Scorpio gari gisimkoba ra·e katangaha aro ja·mano ia gariko Jaiaw-o so·chipe galahachim.
