TURA: Adita salrangna skang, dingtang dingtang dolrangni nangrime bikotgipa All Garo Hills Joint Action Committee (AGHJAC), Union Ports, Shipping & Water Ways aro AYUSH Minister Sarbananda Sonowal-ko New Delhi-o grongenba, Garo Hills-o Central AYUSH medical college-ko kulichina didiangaha.
Union Ports, Shipping & Water Ways aro AYUSH Minister Sarbananda Sonowal-ko grongenio dongpae bakko ra·anggipa AGHJAC-ni membor-rangara, AGHJAC-ni adviser Roger Benny A Sangma, AGHJAC-ni convenor Balkarin Ch Marak, GSU Eastern Zone-ni president Saljrang Tengrik R Marak, GSU HQ-ni president Zikku Balgra N Marak, GSMC Garobadha unit-ni chairman Ryan Ch Marak, GSU northern zone-ni general secretary Walseng N Sangma, FAF North Garo Hill-ni president Jagir M Sangma, GSU Western Zone-ni president Tengsan M Marak aro GSU Chibinang unit-ni general secretary Kengkrong B Sangma ong·a.
Sonowal-ko grongeani somoio AGHJAC-ni dilgiparang baksa Shillong-ni MP Vincent H Pala-ba dongpae bak ra·angaha.
Sarbananda Sonowal baksa agangrikengmiting somoio A·chik samni gamchatgipa ong·ani bidingo AGHJAC-ni adviser Roger Benny A Sangma, talataniko on·angenba, Shillong-ni Mawdiangdiang-o North Eastern Institute of Ayurveda & Homoeopathy (NEIAH)-ko kulina gita 2008 bilsini March 27 tarikon ma·mong sorkari ra·chakmanaha aro iako 2016 bilsini December 22 tarikon Ayush Ministry, a·bachengate on·aha indiba Garo Hills-oba sama·chikrango pangchake janggi tangenggipa manderangnaba Centre AYUSH medical college-ko kulie on·na nangenga ine parakangaha.
Iani ja·mano, AGHJAC-ni dilgiparang, Garo Hills-o central Garoland university-ko songe on·china gita didie External Affairs aro Education-ni Union Minister of State Dr Rajkumar Ranjan Singh-koba grongeaha.
Ia tom·anio AGHJAC-ni dilgiparang, Union Minister of State-na talataniko on·angengon, Garo Hills-o recognize ong·gipa skul aro college-rang chu·onga gitan donggenchimoba da·o dipet university-de North Eastern Hill University (NEHU)-san dongkuengani a·sel university-rango poraina nangenggipa chatro chatrirangna biaprang chu·ongjaenga ine Garo Hills-o Central Garoland University-ko kulie on·china Union Minister-ko didiangaha.
