TURA: Re·anggipa jao, East Garo Hills a·jani song damsao bilsi 14 ong·gipa me·chik bi·sa saksako kragija dake kal·akani gimin police-rang, father saksako rim·aha aro da·o ia pamongko sal 14-na judicial custody-o donataha ine kobor on·aha.
Re·anggipa jao, East Garo Hills a·jani Chidimit songo donggipa St James School-ni headmaster aro pamong Fr James Parathanathu, ia me·chik bi·sani nokona re·ange uko kragija dake kal·akahachim. Ua somoio ia me·chik bi·sani ma·a paa, a·bao kam ka·engmiting ong·e noko darangba dongjachim aro ia cholko ra·e ua ia me·chik bi·sako kragija dake kal·akahachim.
Bi·sani ma·a paa nokona re·baon uamang uni grape dongako nikeaha aro ja·mano ua an·tangna ong·a obostako an·tangni ma·gipa pagipana aganaha. Ia a·sel ong·ani ja·man bi·sani ma·a paa, police-rangona re·ange ia pamongni kosako badi ka·eaha indiba ua somoio uko rim·na re·angon ua biaptangoni kate dongahachim.
Indake ong·genchimoba, ja·mano police-rang ia pamongko rim·na man·aha aro uko da·o sal 14-na judicial custody-o donataha ine East Garo Hills a·jani SP Bruno A Sangma parakataha.
Ia a·sel ong·ani ja·mano Father James Parathanathu-ko uni kamoniko ra·galataha ine Tura Bishop House-ni Diocesan Fr Kurian P parakatskaaha.
“Uni kosako jakgitela am·sandianirangko dakna man·na gita uko Parish-ni pamong ong·aoniko aro St James School-ni headmaster ong·aoniko ra·galataha,” ine Fr Kurian parakataha.
