TURA: West Garo Hills a·jani Jengjal-o kulina sienggipa Cryogenic Oxygen Plant-ni kamrangko matchotmanaha aro ia oxygen plant-ko ia antini gisepon kulie on·anggnok ine Sombar salo, Meghalaya a·dokni Chief Minister Conrad K Sangma parakataha.
Ia oxygen plant-ko Sombar salo a·dokni Chief Minister, Tura-ona re·angengmiting somoio nipakangjolaha aro kamrangko matchotahani gimin an·tangni kusi ong·aniko parakataha.
Jengjal-o ia Cryogenic Oxygen Plant-ko kuliahaode ia oxygen plant-oniko Garo Hills-ni dambonga a·jarang baksana West Khasi Hills a·jani mitam biaprangnaba oxygen-rangko suale on·gnok ineba Chief Minister parakataha.
“Ia biapo oxygen plant-ko kulianichi Garo Hills-ni dambonga a·jarangna aro West Khasi Hills a·janaba oxygen-rangko on·na man·gnok. Ian mongsonggipa biap ong·ani gimin ia biapo oxygen plant-ko kulianiara pilaknan namgni ong·gen,” ine Chief Minister parakataha.
Jengjal-ni Cryogenic Oxygen Plant-ko a·dokni Chief Minister Conrad Sangma, Sombar salo niangenga.