TURA: Phulbari-ni Community Health Centre (CHC)-o sanna banani cholrangko namdapatchina gita Garoland State Movement Committee (GSMC) Phulbari regional unit aro Federation of A·chik Freedom (FAF) Bikonggre unit, sorkario dabiangaha.
Iani bidingo Tura-ni District Medical & Health Officer (DM&HO)-na sedoatengon, ia CHC-o doctor aro gipin kam ka·giparangba chu·ongjaenga, palangrangba chu·onga gita dongja, samrangba chu·onga gita dongja aro ia CHC-na nokrangkoba rikdape on·na nangenga ine dolgni NGO-rang parakataha.
Iani bidingo sorkarina u·iate, jolo songdongenggipa manderangni namgnina ia CHC-ko ta·raken namdapatchina gitaba GSMC aro FAF dolrang, West Garo Hills a·jani DM&HO-ko didiataha.
