TURA: A·dok sorkarini ra·gatgipa Farmers’ Collectivisation for Upscaling Production & Marketing Systems (FOCUS) program-ni bak gita Mongolbar salo a·dokni Chief Minister Conrad K Sangma, South West Garo Hills a·jaona re·ange jolo game ge·e cha·enggipa aro bading chiwale cha·enggipa manderangko grongeaha aro ia tom·anio ua jinmana aganprakengon, a·dok gimikon Meghalaya Basin Management Authority (MBMA)-ni dakchakanichi bading chiwalgiparangna aro game ge·e cha·enggiparangna training-ko on·na gita ia prime hub-rangko kulienga aro ia Prime Hub-ko bakan South West Garo Hills a·jaoba kulignok ine parakangaha.
Batanggimin somoirangoba ia apsan program-ni ning·on ua, a·dokni dingtang dingtang biaprangona re·ange game ge·e cha·giparang aro bading chiwalgiparang baksa agangrike, sorkarini on·enggipa dakchakanirangko man·na gita ku·cholsan nangrime ‘producers group’-rangko bikotchina didiengachim ine nikna man·a.
Ia FOCUS program-ara game ge·e cha·giparangko ku·cholsan ong·ate ‘Producers Group’-rangko kulienba tangka paisani gita dakchake on·na Meghalaya Basin Management Authority (MBDA) baksa sorkarini nangrime ra·gatgipa program ong·achim ine nikna man·a.
Ia tom·anio ua jolni game ge·e cha·gipa aro bading chiwalgiparang baksa agangrikangengon, a·doko game ge·e man·gipa bosturangko pala sim·anio dakchake on·na, sud grigipa loan-rangko man·e on·na aro gipin dakchakanirangko on·na gita sorkari on·kange kamko ka·enga ine Chief Minister parakataha.
Meghalaya a·doko songdongenggipa manderangoni bang·batan gama ge·anio pangchake janggi tanggiparangsa ong·ani gimin a·dok sorkari, game ge·e cha·enggipa manderang namgnirangko man·china gitasa ia program-ko a·bachengataha ineba Sangma aganaha.
Ia tom·anio dingtang dingtang producers group-rangna tangka paisani gita dakchakanirangko on·na dingtangmancha cheque-rangkoba suale on·angjolaha.
