SHILLONG: Constitution-ni Sixth Schedule-ko taridapna sienggipani bidingo a·dok sorkari, Bristibar salo bon·kamgipa changna a·dokni damgittam autonomous district council (ADC)-ni chief executive membor (CEM) aro deputy CEM-rang baksa tom·e chanchirimangtaiaha aro dingtang dingtang dolrangni dabiengani gitan Sixth Schedule-ko taridapanio ‘unrepresented tribe’ kattako ra·galchina gita Parliament Standing Committee-na ku·pattaniko on·angaha.
Constitution-ni Sixth Schedule-ko taridapna sienggipao ma·mong sorkarini ‘unrepresented tribes’ ingipa kattako ra·chapna miksongengani gimin Garo Hills-ni dolbonga NGO-rang, chong·motan GSU, AYWO, FKJGP, ADE aro FAF dolrang jegalatenba, Sixth Schedule-ko taridapanio ‘unrepresented tribes’ kattako ra·chapgenchimode mikkangchi Garo Hills-o dingtang dingtang Tribal-rangni meli nangrime janggi tanganiko nisigalani gita ong·gen ine mikrakataniko on·angahachim.
Indake ong·engon, Bristibar salo a·dokni Chief Minister Conrad Sangma-ni dilanichi MDA sorkari, damgittam ADC-ni dilgiparang baksa chanchirimangataienba, Sixth Schedule-ko taridapanio ‘unrepresented tribes’ kattako kimitchina Parliament Standing Committee-na ku·pattianiko on·anggen ine tik ka·angaha.
A·dokni damgittam ADC-rango seat-rangko bariatani gimin chanchiangengon, district council-rango nominate ka·ako man·gipa membor sakbriko man·chape membor-rang batbewal sak 40 ong·na nanga indiba district council-ni kri, seat-rangko dam 40-na batgija an·tangtangni nangnikani gita tik ka·na man·gen ine sorkari tik ka·angaha.
Songadam nokadamrango namroro silroroatani kamrangko jakgitele ka·angkuna man·na gita Garo Hills-na village council-ko aro Khasi-Jaintia Hills-na village dorbarko seokangkuna man·gen ineba sorkari tik ka·angaha.
Nokma, Dorbar Shnong ba uandake songko nokko dilenggiparang skango gitan kamko ka·na bil dongangkuna nanga ineba sorkari ia tom·anio tik ka·e donangaha.
