Jengjal-ni Cryogenic Oxygen Plant-ko Power Minister kulie on·anga

TURA: Jengjal jolni Baljek-o songgipa 20 KL Cryogenic Oxygen Plant-ko Sukrobar salo, Meghalaya a·dokni Power Minister James K Sangma-ni jakchi kulie on·angaha aro ia oxygen plant-ko kulie on·anganio Jengjal-ni MDC Grahambell A Sangma, West Garo Hills-ni Deputy Commissioner Ram Singh, Joint DHS Dr JK Marak, DM&HO Dr MR Sangma, jolni nokma, sordarrang aro gipin official-rangba dongpae bak ra·angaha.
Ia oxygen plant-ko kulie on·angani somoio a·dokni Power Minister, jinmana aganprakangengon, ia oxygen plant-ko kulianichi Garo Hills-o manderangna an·seng baljokaniko on·na kam ka·anio bang·a dakchakanirangko on·na man·gnok ine ia oxygen plant-ko kulina rakbee kamrangko ka·dilahani gimin a·dokni Chief Minister Conrad K Sangma-ko mittelpilangaha.
Jengjal-o ia cryogenic oxygen plant-ko kuliahani gimin da·ode a·dokni Health department, oxygen-ko Assam a·dokni Bongaigaon-oniko ra·bana nangjawaha aro ia plant-onikon Garo Hills gimikna aro West Khasi Hills a·jani mitam biaprangonaba watna man·gnok ineba Sangma aganaha.
Jengjal jolara mongsonggipa biap ong·ani gimin mikkangchi ia jolrango sorkari, dingtang dingtang namroro silroroani kamrangko ra·bana sienga ineba ua jolni manderangna parakangaha.
Jengjal jolo bakan sub-divisional hospital-ko kulina sienga ine parakatengon, ia hospital-an Garo Hills-na referral centre gita ong·gen ine Sangma, sorkarini kamrango bakrimaniko on·china jolo songdongenggipa manderangko didiangaha.
COVID-ni tikako chu·gimik su·mangimin songrangna sorkari, boksisrangko on·enga ine janapatengon, ia kenbegnigipa sabisioniko an·tangtangko naljoke rakkina gita tikarangko su·e ra·china jolo songdongenggipa manderangko didiangaha.
Ia oxygen plant-ko kulie on·angani somoio jinmana aganprakanggipa gipin manderangara, West Garo Hills a·jani Deputy Commissioner Ram Singh, Joint DHS Dr JK Marak, West Garo Hills a·jani DM&HO Dr MR Sangma aro gipinrang ong·a.