TURA: Adita salrangna skang Garo Hills-ni dingtang dingtang dolrang, chong·motan Tura Garo Senior Citizens Forum (TGSCF), New Tura Development Forum (NTDF) aro Garo Graduates Union (GGU)-ni dilgiparang, Meghalaya a·dokni Chief Minister Conrad K Sangma-ko uni noko grongenba, manderangni nangchongmotenggipa kamrangni bidingo agangrikangaha.
Ia tom·anio dolgittam NGO-ni dilgiparang, Chief Minister baksa agangrikangengon, West Garo Hills a·jao District School Education Officer (DSEO)-ni kamko jako ra·e ka·enggipa Ela Begum Lasker-ko DSEO, School Education-ni Joint Director aro Tura Government Girls Higher Secondary School-ni principal ong·aoniko ra·galchina dabiangaha. Tura-ni Rongkhon-o donggipa College of Teachers Education (CTE)-ni da·o principal ong·e kamko ka·enggipa ia kamna qualify ong·ja ineba ia mandeni biapo gipinko principal songskachina gitaba ia dolgittam NGO-rang, a·dokni Chief Minister-ko didiangaha.
Tura Medical College-ko matchotchipkujaengani giminba ia tom·anio TGSCF, NTDF aro GGU-ni dilgiparang, a·dokni Chief Minister baksa agangrikangtaiaha aro da·o cholko man·engmiting somoion iako ra·rikjahaode skang changrango gitan ia medical college-ko gimaatna nangao ga·aktaigen ine gisik ra·ataniko on·angaha.
Ia dolgittam NGO-rangni parakatani gitade, da·o Manipur a·dokni Imphal-o ong·enggipa Regional Institute of Medical Sciences (RIMS)-ko 1974-75 bilsirango Tura-osa kulina proposal-ko on·chengahachim indiba ua somoio dingtang dingtang dolrang jegaltokahani a·selsa da·o ia institute Imphal songjinmao ong·na gita nangahachim. Apsan daken, da·o Shillong songjinmao ong·enggipa North Eastern Indira Gandhi Regional Institute of Health & Medical Sciences (NEIGRIHMS)-koba Tura-osa kulina proposal dongachim indiba ia institute-ko 2001-2002 bilsirango joltangni MLA-an jegalahani a·selsa da·o ia institute-ba Shillong-o ong·na nangaha ine dolgittam NGO-rang parakataha.
Tura medical college-ko rikani bidingo agangrikengon, ia medical college-na nangenggipa Tura civil hospital-ko apalbatatna man·na gita ta·raken ia hospital-ni a·ao niam gri napsruke songdong a·chaenggipa manderangko a·rikgalchina gita dolgittam NGO-rang, Chief Minister-ko didiataha.
Ru·uta bilsirangna contractual teacher-ni kamko ka·e MTET porikkako pass ka·na man·gijagipa skigiparangko LP skulrango regularise ka·china gitaba ia dolgittam NGO-rang, a·dokni Chief Minister-ko didiangaha. Ru·uta bilsirangna kamko ka·ani ja·man da·o ia skigiparangni kamko bon·atahaode maming janggi tangani cholrang dongjawaha ine ia skigiparangko kamo regularise ka·china gita dolgittam NGO-rang, Chief Minister-ko didiangaha.
