SHILLONG: MPCC-ni gital president aro Shillong MP Vincent Pala, MDA sorkariko East Jaintia Hills-o niamgri coke factory chalaianiko bon·atna man·-jani gimin matnangaha. Sorkari, a·dokni mande-rangna chanchija an·tangni pocket-na ba man·gniko-san sandigipa ong·a ineba matnangaha.
Sutnga jolo, niamgri coke factory bang·rik-rikengani a·sel obosta bilongen namjaenga. Coke factory-ko niam gita chalaia ong·ode maming neng·-nikani dongjachim indiba da·ora Khasi aro Jaintia Hills-na ge 80 coke factory-ko sanction ka·aha, ia karkanarangoni baditan carbondioxide ong·katgen iani gimin chanchiate nibo, ine Pala aganaha.
Sorkari an·tangni man·-gnikosan nienga, mande-rangni gimin chanchija-enga, unbaksana dingtang dingtang deparment-rangba meligrike kam ka·a dongja. Minggipin Sutnga-ni manderang namen tom·tomgipa ong·achim indiba ia changde coke factory-ni a·sel ramaona ong-·akate jingjengatokenga ineba Pala agandapaha.
“Da·odipet dam 8 coke factory-san donga, unon jolni manderang baditan namgija balwako chakna gita nangenga aro mik-kangchi factory baridapode Khasi aro Jaintia Hills-ni manderang maidake janggi tanggen ine Pala sing·-doataha.
Ia mamlao inquiry ka·anisande chu·ongja, manderang court-ona re·angna nanga aro je authority-an coke factory-ko songna ra·chakaniko on·engachim uamangba aganchakna nanggen, ine agankuaha. Uandake Pala, party-ni gitcham dilgi-parang jemangan party-oni ong·katahachim uamangko rimbapilna kam ka·na aganaha. Congress-ni git-cham MLA Pynshyngain Syiem-ba party-ona re·ba-pilan aganaha. Aro gipin dilgparangkoba party-ona rimbapilna jotton ka·gen uandake Party-ko bilakatna gimik dilgiparang baksa melie kam ka·gen ineba Pala aganaha. MDA, an·tangna namgnikosan sandia: Vincent Pala
