SHILLONG: Meghalaya a·doko COVID sabisio mande siani batanggimin adita salrangoni komiangna a·bachengaha. Mijal salni bako sakgittam manderang COVID sabisi man·e siangaha, uamangoni East Khasi Hills-o saksa aro sakgni West Jaintia Hills-oni ong·achim.
Batanggimin konta 24-ni gisepo Meghalaya a·doko sak 257 manderang COVID-19 sabisiko man·apaha, jeon sak 207 gipinrang Covid sabisioni nampilskaaha. Mijal salni bako East Garo Hills aro North Garo Hills, ia district damgniode COVID man·dapgipa dongangjaha.
Meghalaya a·doko COVID-19 sabisiko man·giparang mijalona sak 75,336 gapangaha, uamangoni sak 71,327 manderang sabisioni nampilaha, sak 1,299 manderang COVID-o uamangni janggirangko gimaataha, COVID man·enggiparang da·oba sak 2,710 dongengkua.
