SHILLONG: Adita salrangna skang, Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko police-rangni so·otani ja·man dingtang dingtang dolrangni matnanganiko man·e a·dokni Home Minister Lahkmen Rymbui, kamtangko watna Chief Minister-na seatani ja·man, a·dokni gitcham home minister aro da·o Power Minister-ni kamko jako ra·enggipa James K Sangma-ba Rymbui-na chakpaani kattarangko parakataha.
“Home department-ko jako ra·e ka·aniara altua kam ong·ja maina anga an·tangba ia kamko jako ra·e nikaha aro ian namen neng·begipa daito ong·a,” ine Sangma parakataha.
Iandakgipa department-ko jako ra·gipa manderangkode ramram manderangba ta·raken jaksi otrongaia ineba Sangma parakataha.
James Sangma-ni home minister ong·engmiting somoio dingtang dingtang kamrangni gimin MDA-o bakrimenggipa UDP aro gipin dolrangba Sangma-ko matnange, kamoniko ra·galchina dabiahani gimin uoniko Home department-ko ra·gale ja·mano Home department baksana gipin mongsonggipa department-rangkoba UDP-ni MLA Lahkmen Rymbui-na on·skaahachim ine nikna man·a.
HNLC-ni gitcham dilgipako so·otgalani ja·man Rymbui-ba bakan, Home department-ni kamko ra·galchina didie a·dokni Chief Minister-na sedoatskaahachim.
Indake ong·genchimoba da·o dipet uni home department-oniko watchina bi·aniko Chief Minister ra·chakskakujaengachim aro iani bidingo ua name niengkua inesa Chief Minister aganskaahachim.
“Minister-rangna portfolio-rangko suale on·anide chief minister-ni kaman ong·a aro angni chanchiani gitade, chingna je portfolio-ko on·genchimoba chinga uko name chu·sokata ong·ode uan maming ong·ja,” ine Sangma aganaha.
