SHILLONG: Umngot Hydro Electric Project-na soi ka·gipa Memorandum of Understanding (MoU)-ko sorkari den·galpilaha ine Sombar salo a·dokni Power Minister James K Sangma parakatani ja·man jolni dingtang dingtang dolrang, sorkariko mittelpilangenba, mikkangchiba Umngot-o iandakgipa hydel project-rangni gimin jolni manderang baksa agan-chanchirimna man·jawa ine mikrakataniko on·angaha.
“Power Minister-ni agangimin gita mikkangchiba chinga Umngot-o hydel project-rangko ra·gatani bidingo dingtang dingtang dolrangni chanchianiko ra·na gita tom·anirangko ong·atna on·jawaha,” ine Meghalaya Tourism Development Forum (MTDF)-ni president Allan West Kharkongor parakataha.
Kharkongor-ni u·iatani gitade, adita salrangna skangba iani bidingo Tourism-o nangchakegipa dingtang dingtang dolrang, chong·motan Meghalaya Tourism Development Forum (MTDF), Meghalaya Rural Tourism Forum (MRTF), Federation of Shillong Hotels (FOSH), Tour Operators Association of Meghalaya (TOAM), Tour Guides Association of Meghalaya (TGAM), Shongpdeng, Darrang, Dawki-ni Tourism dolrang aro Transport Association of Meghalaya-ni dilgiparang apsan tom·e chanchirimangaha.
“Umngot chiringo Hydro Electric Dam rikna manchianiko jegalna gita chinga pilakan apsan nangrime tik ka·aha,” ine Kharkongor parakataha.
Umngot chiringo sorkarini dam rikna manchianiko jegaldilgipa Joint Action Committee-na chakpaaniko on·na gitaba ia tom·anio uamang tik ka·angaha ineba Kharkongor parakataha.
Kharkongor-ni aganani gitade, Umngot chibima rikamo donggipa pilak songrangan da·o aro mongsongbate sin·karini somoirango manderangni rona namnikbatgipa biaprangoni damsa ong·enga ine nikenba, ia tom·anio pilak dolrangan, ia chibimako ripinge rakkiangna gita tik ka·tokaha.
Ia chibimao dam-ko rikgenchimode mai dakgipa namgijanirangko ra·bana man·genchim, uarangni gimin talataniko on·angengon, India a·songosan ong·aigija a·gilsak gimikon ia Umngot chiringko rongtalbatsranggipa chibima ine mingsingenga indiba ia chibimao dam-ko rikahaode ia pilakan nisiako man·gnok ine Kharkongor parakataha.
“Ia chibima nosto ong·atako man·ahaode, guest house-rangko chalaienggipa, camping-rangko chalaienggipa, ring choe cha·gipa, tourist guide, mande salruragipa, cha·anirangko palgipa aro uandake ia biapo dingtang dingtang dake janggi tangani cholrangko man·paenggipa manderangba nangchakeaniko man·gnok,” ine ua aganaha.
Mikkangchiba ia chibimako aro chibima rikamo donggipa dingtang dingtang songrangko ripinge rakkiangkuchina gitaba dingtang dingtang dolni membor-rang, a·dok sorkariko didiangaha.
