TURA: Constitution-ni Sixth Schedule-ko taridapna gita Meghalaya sorkarini recommendation-ko ma·mong sorkari bi·engon, da·o dipet sorkarini gita recommendation-ko on·kujachina East Garo Hills a·jani Williamnagar Bar Association, a·dokni Chief Minister Conrad K Sangma-ko didiataha.
Koborko on·ani gitade, Sixth Schedule-ko taridapna sienggipani bidingo Williamnagar Bar Association, tom·e chanchirimangenba, recommend ka·ani kamrangko dontongatchengchina gita a·dokni Chief Minister-ko mol·molna tik ka·angaha.
“Constitution-ni Sixth Schedule-ara salgro salaramni Tribal-rangna on·gimin bilrangko rakkina aro niam bidikko chel·chakna dongimin niamrangsa ong·a aro ia niamko taridapanio manderangna u·iatchenggija ba agangrikchenggija recommend ka·genchimode ja·mano obostarang namjabataona soknaba gnang. Uni gimin sorkarini tik ka·gimin kamrangni bidingo jinma u·iatchengchina aro iako ma·mong sorkariona ra·angna skangba an·tangtangan ra·chakna man·gnigipa ong·china gita ia recommendation-ko da·o dipet ma·mong sorkariona on·atkujachina chinga mol·molenga,” ine Williamnagar Bar Association-ni dilgiparang parakataha.
