TURA: Meghalaya a·doko 4th Teacher-rangni dormahakoba bariatna gita School Education & Literacy Director (DSEL)-ni changni chang proposal on·atani ja·manoba sorkari ra·chakkujaengani a·sel 4th teacher-rang da·onan jao gong 12,000-kosan cha·pana nangenga ine All Meghalaya 4th Teachers Association (AM4thTA) Garo Hills unit matnangataha.
AM4thTA-GH unit-ni president Tengsrang K Sangma-ni parakatani gitade, 4th Teacher-rangni dormahako bariatchina changni chang dabiani ja·manoba maming ja·kurangko de·jaengani gimin DSEL-o RTI ka·e am·sandion, 4th Teacher-rangni dormahako bariatna gita DSEL-oni changbrina kingking proposal-ko Cabinet-ona watatahachim indiba DSEL-ni proposal-ko Cabinet ra·chakkujaenga ine ma·sina man·aha.
“4th Teacher-rangni dormahako bariatna gita changni chang proposal-ko on·atani ja·manoba ra·chakgija donaniara a·dokni 4th Teacher-rangko sorkarini nichanggalaniko mesokani ong·enga. Ia sal somoirango mandeni nangchongmotgipa bosturang pilakan dam rakengaha aro gong 12,000 dormahachi nokdang chalaianiara ong·na amgijani ong·enga,” ine AM4thTA-GH unit-ni president parakatenba, 4th Teacher-rangni dormahakoba gipin skigiparang baksa apsan on·china sorkariko didiattaiaha.
Indian Constitution-o dongimin niamrangni gimin janapatengon, assistant teacher aro 4th teacher-rangni poraiani gadang aro kamrang apsan ong·genchimoba dormaha man·anirangde apsan ong·jaenga maina 2013 bilsini April 1 tarik dipet assistant teacher-rang gong 9000/- dormahako man·ahaoba 4th teacher-rangde gong 6000/-kosan man·aiachim aro 2017 bilsini January 1 tarik dipet SSA assistant teacher sakgittamde gong 20,493/-ko man·engoba 4th teacher-rangde da·onan japrako gong 12,000/-kosan man·engkua ine AGH4thTA GH unit parakataha.
Re·baenggipa September 10 tarikoni Assembly-ni Autumn Session-ko ong·atna siengani gimin ia session-ko ong·atanio 4th Teacher-rangni dormahako bariatna proposal on·aniko ra·chakchina gitaba AM4thTA GH unit, a·dok sorkariko didiangaha.