SHILLONG: Re·anggipa jao Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko so·ote galanio jak donggipa police officer-rangko kamoniko ra·galchina gita a·dokni mitam Cabinet minister-rang aro NPP-chi dilenggipa MDA-o bakrimenggipa MLA-rangba a·dok sorkariko didina manchiangaha.
Meghalaya a·dokni Director General of Police (DGP) baksana gipin sakgni police officer-rangko kamoniko ra·galchina didie, adita salrangna skangsan, ‘Ka Sur Ki Nong Mawlai’ ba Mawlai-o songdongenggiparangni ku·rang dolni dilgiparang, sak 15 minister aro MLA-rangko gronge chittirangko sedoahachim ine nikna man·a.
Iani bidingo talataniko on·angengon, Mawlai jolo donggipa dingtang dingtang dolni dilgiparang, uko gronge uni dakchakaniko bi·aha ine PDF-ni president aro a·dokni Agriculture Minister Banteidor Lyngdoh parakataha.
“Uamangni angna seatgipa chittio pangchake anga sorkari baksa agangrikgen,” ine Lyngdoh parakataha.
Apsan daken a·dokni PHE Minister Renikton Lyngdoh Tongkhar-ba iani bidingo sorkari baksa agangrikgen ine parakataha.
“Mawlai jolni dingtang dingtang dolrang angko mol·molahani gimin police officer-rangko ra·galchina sorkari baksa agangrikaniara angni kaman ong·enga,” ine Tongkhar aganaha.
Iani bidingo Chief Minister-ni Adviser aro BJP-ni MLA AL Hek-ba janapatengon, Mawlai jolo donggipa dingtang dingtang dolrangni una seatgipa chittio pangchake ua a·dokni Chief Minister-na seatskagen ine parakataha.
HNLC bobil dolni gitcham dilgipako so·ote galani bidingo jakgitele aro kakketo am·sandina man·na gita a·dokni DGP aro gipin sakgni police officer-rangko kam dontongatchengchina dingtang dingtang dolrang dabitokengon, ia police officer-rangni kosako maming ja·kurangko de·kujaengani gimin North Shillong-ni MLA Adelbert Nongrum-ba an·tangni suk ong·gijaniko parakataha.
“HNLC-ni gitcham dilgipani siani a·selko jakgitele aro kakket bewalo am·sandichina pilakan nangniktokenga. Dingtang dingtang dolrangni dabiengani gita ia police officer-rangko kam dontongatchenggenchimosa ia a·selni bidingo jakgitele am·sandina man·gen,” ine Nongrum aganaha.