TURA: Re·anggipa September 1 tarik dipet Meghalaya a·dok gimikon skulrangko kulipiltaina gita on·ahaoba Tura-ni Sherwood School-o poraienggipa chatro saksa COVID-19 man·ahani gimin ia skulko Bristibar sal dipet chipe donatpiltaina nangao ga·akaha.
Sherwood School-ni principal Tyrone D’ Brass-ni kobor ra·timgiparangna u·iatani gitade, ia skulni class X-o poraienggipa chatro saksa, Bristibar salo COVID positive ong·aha aro ia chatroni positive ong·a bakan ia skulko chipe donatpilchina gita Health official-rang u·iataha.
“Bristibar salo ua skulona re·bajaha indiba skulni pilak class-rangkon chipe donatchina gita health official-rang u·iataha,” ine Sherwood School-ni principal parakataha.
Ia skulni class X-o poraienggipa gipin chatro chatrirangkoba Sombar pringo, COVID-na porikka ra·e nianggen indiba chatro chatrirang COVID-19-ni chinrangko man·enga ong·ode Sombar salna skangan an·tangtangni dedrangko porikka ra·e nichina gita ma·a paarangko didiatmanaha ineba Tyrone parakataha.