Sixth Schedule-ko taridapani bidingo CM baksa chanchirimtaigen: GHADC CEM

TURA: Constitution-ni Sixth Schedule-ko taridapna gita ma·mong sorkarina recommendation-ko on·anio dingtang dingtang dolrang melikujaengani gimin re·baenggipa September-ni 10 tariko, dingtang dingtang dolrang, Meghalaya a·dokni Chief Minister Conrad K Sangma baksa Shillong-o tom·e chanchirimangtaigen ine Sukrobar salo Garo Hills Autonomous District Council (GHADC)-ni Chief Executive Membor (CEM) Benedic R Marak parakataha.
Sixth Schedule-ko taridapani bidingo dingtang dingtang dolrangni nangrime bikotgipa All Garo Hills Joint Action Committee (AGHJAC)-ni dilgiparang, Sukrobar salo GHADC-ni CEM aro Deputy CEM-ko grongeani somoio ia kattarangko GHADC-ni CEM parakataha.
Sixth Schedule-ni Para 3-o pangchake A·chik a·songni A·kingrangko dangtapani dongjawa aro Nokmani bilrangba skango gitan apsan ong·aigen ineba GHADC-ni CEM, AGHJAC-ni dilgiparangna ku·rachakaniko on·ataha.
Sixth Schedule-ni a·jao Municipal-rangko donani gimin dingtang dingtang dolrang jegaltokengon, da·o Sixth Schedule-ko taridaptaianio iakoba nie nanga gita taridapna nanganirangko taridapgen ine Marak parakataha.
Sukrobar salo AGHJAC-ni dilgiparang, GHADC-ni CEM aro Deputy CEM-ko grongenba, Sixth Schedule-ko taridapani bidingo Meghalaya sorkarini gita recommendation on·aniko donkuchina gita didiangahachim.
GHADC-ni CEM aro Deputy CEM-ko grongeanio bakko ra·anggipa AGHJAC-ni membor-rangara, AGHJAC-ni adviser Roger Benny A Sangma, AGHJAC-ni convenor Balkarin Ch Marak, GSU Eastern Zone-ni president Saljrang Tengrik R Marak, GSU HQ-ni president Zikku Balgra N Marak, GSMC Babadam unit-ni chairman Cyril A Sangma, GSU northern zone-ni general secretary Walseng N Sangma, FAF North Garo Hill-ni president Jagir M Sangma, GSMC Garobadha regional unit-ni chairman Ryan Ch Marak, GSU Western Zone-ni president Tengsan M Marak, GSU Chibinang unit-ni general secretary Kengkrong B Sangma, GSU Eastern Zone-ni vice president Silbil N Marak, GSU Eastern Zone-ni general secretary Aelsebirth M Sangma, Garo Graduates Union (GGU)-ni president Dr Merril N Sangma, New Tura Development Forum (NTDF)-ni president David Ch Marak aro gipinrang ong·a.