SHILLONG: A·doko niam gri koela bikotani aro salkuengani bidingo a·dok sorkari maming ja·kurangko de·gija nie dongengani bidingo opposition Congress MLA an·tangni suk ong·gijako parakaha.
“A·doko koela cha·ue salengaoniko da·o, adita salrangna skang mangmang koela salenggipa trak gari ramao a·sel ong·anichi, parake mesokaha aro manderang uoniko u·ie ra·na gita man·aha. Uarangsanba ong·aigija, bang·a trak garirangan u·ina man·pilgija cha·ue koela salangtokengachim,” ine Opposition Congress MLA, Mayralborn Syiem, uni constituency gita niam gri koela salpakangengako rim·a man·enba an·tangni suk ong·gijako parakaha.
Congress MLA, iani bidingo aganatkuengon, NGT a·doko lak 2 metric ton koelarangko mangmangsan salangchina gita hukumko on·ahachim, indiba a·doko niam gri koela bikotdapdapenganichi da·ona kingkingba bon·kujaenga ineba mesoke aganaha.
Batanggimin chango Assembly session-o a·doko koela salenggipa niam gri salenga ong·ja, indiba gari bol ritchani ritcha koela salenggiparangan chalan gnangsa salenga aro uarangko niam gita nirikkie ra·china nirikkie ra·enggipa sipai dolrangko donatmanaha ine Chief Minister Conrad Sangma-ni agangipa kattarangko MLA jeatenba, da·ona kingkingba a·doko niam gri koela salengako nikna man·kuenga ine aganatskaaha.