WGH-o niam gri challaienggipa karkana Jinjiram chibimao jabol galenga

TURA: West Garo Hills a·jani a·kawe jolo donggipa Phulbari bajar aro uni sepangjolo niam gri challaienggipa karkanarang, samtangtango donggipa biaprangko rongtal-an·tale rakkina aro a·jolrangko tangseke rakkina sorkarini ra·gatgimin niamko pe·e, uamangni karkanarango ong·katatenggipa jabolrangko ua jolrang gita jokpakatenggipa Jinjiram chibimaona watgalatenganichi chibimako jabol ong·atengan baksa jolo donggipa manderangni an·seng-baljoke dongaoniko nosto ka·enga ine u·iataha.
Phulbari jolni Garo students’ union (GSU)-ni dilgiparang, jolo iandakgipa karkanarangko maming lekka-patrorang donggija niam gri challaienggipa karkanarangko challaienganichi chibimarangko jabol nangatengani gimin, State Level Public Grievances Committee-ni Chairman aro Bajengdoba-ni MLA Pongseng R Marak-na badi ka·doangaha.
“Chinga iabi bidingo jolona re·ange nirokeaha aro niam gri challaienggipa karkanarang, ma·mong sorkarini gita samtangtangko rongtal-an·talate rakkina niam ra·gatgimin, chong·motan (India environmental norm)-rangko pe·e, uamangni karkanarango so·e cham·gijagipa jabolrangko chibimaona watgalenga,” ine Phulbari GSU-ni president Francewell Marak parakataha.
GSU dilgiparangni badi ka·doangani gitade, jolo donggipa petrol pump (oil station), badiaba sima-ari jolrango donggipa rama gita niam gri Bangladesh-chi palbadingatengani a·sel, pangnan joltangna to (petrol aro diesel)-rang bon·chongdikatskaenga.
Uarangna agreba, jolo donggipa IMFL store-rango niam gri uamangni dokkan ki·sang gita niam gri cha·ue chu palbadingatskaenga. Ua kamrangko ka·enganichi, uamang covid sabisina sorkarini donatgimin somoini sima-arina batpile uandakgipa namgijagipa kamrangko ka·kuenga, ineba GSU dilgiparang matnangaha.