SHILLONG: Meghalaya Legislative Assembly-ni Autumn Session-ko re·baenggipa September 10 tarikoni a·bachengna siengahani gimin a·dokni Opposition Congress dol, Meghalaya a·doko niam gri koela bikotenggipani bidingo sorkariko sing·dona gita tarisamsoengaha.
Meghalaya a·doko niam gri koela bikotaniko champengna man·jaengani gimin sorkarini kamna suk ong·gijaniko parakatengon, “Meghalaya a·doko niam gri koela bikotaniko pilakan nikna man·enga. Adita salrangna skangsan koela salgipa truck gari bolsa bikpile a·sel ong·aha aro iani a·sel a·doko niam gri koela bikotaniko manderang ma·sina man·aha. Iana agreba an·ching bang·en koela salgipa truck garirangni re·ruraanirangko nikjaengasa,” ine Congress dolni MLA Mayralborn Syiem parakataha.
An·tangni constituency gita koela salgipa truck garirangni re·ruraanirangko nikna man·engani gimin ua ia kattarangko aganaha.
Koela salenggipa pilakande niam gri ong·ja ine Chief Minister Conrad Sangma-ni agangipa kattarangni bidingo janapatengon, “Salantian ritchani ritcha koela salgipa truck garirang re·ruraenga aro ia koela salgipa garirangoni badia challan donga aro badia dongja an·ching darangba ma·sija. Iarangko sorkari official-rangan nirok sandina nanga,” ine Syiem aganaha.
“Salantian ritchani ritcha koela salgipa truck garirang re·ruraenga aro iako pilakan ma·sia,” ineba ua aganaha.
East Jaintia Hills a·jao coke karkanarang bang·baroroengani gimin janapatengon, “Niam gri koela bikotanirangko nikengoba sorkari maming ja·kurangko de·jaenga,” ine Congress MLA parakataha.
