TURA: South Garo Hills a·jani Baghmara Greater Water Supply Scheme-ni gita Rongdong dareo dam-ko kaaniara mikkangchi Siju-Rongdong jolrangna nangchakeaniko ra·bagen ine Garo Students Union (GSU) Siju regional unit parakatenba, ia dam kana manchienggipa biapko ia dareoni komibeoba metre 200 ba metre 300 ka·machipak kaskachina didiataha.
Iani bidingo Baghmara-o donggipa PHE department-na sedoatengon, Baghmara Greater Water Supply Scheme-ko ra·gataniara Baghmara jolrango songdongenggipa manderangna chirangko man·na dakchakani ong·gnok indiba Rongdong dareo dam kana tik ka·aniara ia dareni kosako wari kanggipana nangchakeaniko ra·bagen ine GSU Siju unit-ni dilgiparang, suk ong·gijaniko parakataha.
A·ran karini somoirangode ia jolni manderang, Atchandap aro Rongdong darerangonikon chiko pilak kamrangnan jakkaltokenga ine talatangengon, ia mongsonggipa biapo damko kagenchimode manderang chiko jakkalanio neng·nikanirangko man·na nanggnok ine GSU Siju unit parakataha.
Ia biapo dam kagenchimode mikkangchi ia darerang ran·changani cholrangba donga ineba GSU parakataha.
Ia dam kaani project-ko uamang jegalenga ong·ja ine talataniko on·angengon, mikkangchi ia biaprangna maming nangchakeani dongjana gita biapkosa dingtangatchina dabienga ine GSU Siju unit-ni dilgiparang parakataha.
“Chinga dam kaani project-ko jegaljaenga indiba da·o dam kana tik ka·gipa biapkosa jegalenga. Uni gimin dam-ko ia Rongdong dareoni komibeoba metre 200 ba metre 300 ka·mao kaskachina chinga didienga,” ine GSU Siju regional unit-ni general secretary Webing Sangma parakataha.06
