TURA: Arunachal Pradesh a·doko songdongenggipa Chakma aro Hajong jatrangko Arunachal sorkari, gipin a·dokrangona watgale galna tik ka·enga ine Garo Hills-oni United Hajong Community Development Organisation (UHCDO) parakatenba, iandake ja·ku de·na manchianiko jegale iani bidingo a·songni Prime Minister Narendra Modi-na sedoataha.
UHCDO-ni parakatani gitade, Arunachal Pradesh a·doko songdongenggipa Chakma aro Hajong-rangko gipin a·dokrangona watgalatgen ine re·anggipa August-ni 15 tariko Arunachal-ni Chief Minister parakatahachim.
Indake ong·engon, Arunachal a·doko songdongenggipa Chakma aro Hajong-rangko gipin biaprangona watgalatgen ine Arunchal CM-ni agananiko UHCDO jegalatenba, Delhi-ni Chakma Development Foundation of India (CDFI)-ni janapgimin kattarango pangchake, “Chakma aro Hajong-rangna Arunachal Pradesh-o songdongkamna 1996 bilsio Supreme Court-ni rai on·aniko den·galpilna gitasa Citizenship Amendment Act 2019-ko ra·gataha” ine Union Law Minister Kiren Rijiju-ni dingtang dingtang jinma tom·anirangko agananikoba raken jegalataha.
“Chakma aro Hajong-rangko Arunachal Pradesh-o songdongkamna gita Supreme Court-an raiko on·manahaoba da·o Arunachal sorkarini, Chakma aro Hajong-rangko a·rikgalna miksonge parakaniko CDFI-ni Suhas Chakma jegale songbado seatahani gimin chinga dingtang dingtang Hajong dolrangba una chakpaaniko on·enga,” ine UHCDO-ni president B Ch Hajong parakataha.
Iani bidingo ja·kuko de·enba, Arunachal-o songdongenggipa Chakma aro Hajong-rangna dakchakaniko on·china gitaba UHCDO, a·songni Prime Minister Narendra Modi, Union Home Minister Amit Shah, RSS-ni dilgipa Mohan Bhagwat, Assam-ni Chief Minister Himanta Biswa Sarma aro Tripura-ni Chief Minister Biplab Kumar Deb-ko didiatskaaha.