SHILLONG: Meghalaya Residents Safety & Security Act (MRSSA)-ko ra·chakani bilde da·o ma·mong sorkarini jakosajok ine a·dokni Governor Satya Pal Malik parakatenba, iani bidingo ma·mong sorkari baksa agangrikchina a·dokni Chief Minister Conrad K Sangma-ko didiataha.
Iani bidingo kobor ra·timgiparangna talataniko on·angengon, MRSSA-ko ra·chakanide da·o ma·mong sorkarini jakosajok ine Sombar salo, a·dokni Governor parakataha.
“Angna skang governor ong·anggipa mandean MRSSA-ko ma·mong sorkarionasa pakwatatahani gimin angade ia niamko ra·chakna bil dongjaha,” ine Malik aganaha.
Da·o dipet iani bidingo ua ma·mong sorkari baksa agangrika dongkuja ineba Governor talataniko on·angaha.
2016 bilsini September 27 tariko niam pil·atgipa aro 2019 bilsio taridaptaigipa MRSSA-ara Meghalaya a·dokni entry point-rango gipin biaprangoni re·baenggipa manderangko nirok sandisona dongimin niam ong·achim ine nikna man·a.
Ia MRSSA (Amendment) Ordinance 2019-ko a·dok sorkari, a·dokni gitcham Governor Tathagata Roy-ni somoion ra·chakchina on·atahaoba, ia niamrangni bidingo talataniko on·china gita sorkariona watpilatahachim.
Indake ong·engon, ia MRSSA-ko ma·mong sorkariona watataha ine a·dokni Governor aganahani gimin Hynniewtrep Youth Council (HYC) suk ong·gijaniko parakatskaaha aro maini gimin a·doko tarigipa niamara ma·mongona sokangna nanga ine sing·doangskaaha.
