TURA: Garo Hills Autonomous District Council (GHADC)-ni session-ko Sombar salo a·bachengatangaha aro ia session-ko a·bachengatani somoio, ia bilsio a·gilsakko watanggipa GHADC-ni gitcham membor-rangko gisik ra·e mande ra·pilskaaniko dakangaha.
GHADC-ni skanggipa session-ko jagnina skangan ong·ate gital seoka man·gipa membor-rangko ku·mikchetatahachim indiba uni ja·man Garo Hills-o rang·san COVID giproroanichi gnigipa session-ko ong·atchipna man·kujaengachim.
GHADC-ni CEM aro Chairman sakgnian COVID positive ong·ahani gimin ia budget session-ko ong·atna salsa skangsan noktangtango nape dongna draatako man·ahachim.
Indake ong·engon, adita salrangna skang GHADC-ni Chairman Rakesh A Sangma-ni parakatgimin gita ia session-ko Sombar sal dipet a·bachengatna man·aha aro ia session-ko a·bachengatanio GHADC-ni membor-rang pilakan apsan nangrime, ia bilsini gisepo sianggipa gitcham MDC-rangna mande ra·pilskaaniko dakangaha.
Ia bilsini gisepo a·gilsakko watanggipa GHADC-ni gitcham membor-rangara GHADC-ni gitcham chief executive membor Bimsing R Marak, Tura-ni gitcham MDC aro GHADC-ni gitcham Chairman Locksley Robinhood Ch Momin baksana gipin gitcham MDC-rang, chong·motan Greendas Marak, Admiral K Sangma, Bijon Bihari Rechil, Mrinal R Marak aro Jogonsing D Sangma ong·achim aro ia session-ko a·bachengatani somoio ia gitcham dilgiparangna GHADC-ni MDC-rang, kalimaniko aro mande ra·pilskaaniko dakangaha.
Gitcham dilgiparangna mande ra·pilskaaniko dakanio GHADC-ni Chief Executive Membor (CEM) Benedic R Marak baksana Opposition Congress doloniba Sadhiarani M Sangma aro Cherak W Momin, an·tangtangni mande ra·pilskaaniko parakangtokaha.
GHADC-ni Session-ko Budbar salo matchotatgen.
GHADC-ni Session-ko a·bachenganio sianggipa MDC-rangko gisik ra·a
Date:
Share post:
