SHILLONG: Meghalaya a·dokni gitcham Home Minister RG Lyngdoh, Congress dolo nape politics-ni kamrangko ka·piltaina siengaha.
Iani bidingo kobor ra·timgiparangna talataniko on·angengon, uko bang·a manderangan politics-ona re·bapilchina nangniktongengani gimin ua politics-ona re·bapilna tik ka·aha ine Mongolbar salo Lyngdoh parakataha.
“Ango be·enni gita an·senggijanirang dongkuenga aro iako anga namatchengna nangenga. An·tangko an·sengpilatna man·ahaon anga nanga gita ja·kurangko de·anggnok,” ine Lyngdoh aganaha.
2023 bilsini Assembly election-o ua South Shillong constituency-oni susana miksongengama ine sing·on, “Obostarangko nichengna nanggen indiba ja·kuko changprak de·o nambata,” ine Lyngdoh parakataha.
Uni Home Minister ong·engmiting somoio HNLC bobil dolko bon·atna man·ahachim ine Congress dolni gitcham dilgipa RG Lyngdoh-ko manderang mitteltokrongachim.
Meghalaya Pradesh Congress Committee (MPCC)-ni president ong·e kamko ka·a intalan Shillong-ni MP Vincent Pala, Congress dolni gitcham dilgiparangko Congress dolona re·bapilchina didiengachim aro uandaken da·o RG Lyngdoh baksana PN Syiem-ba Congress dolo nappiltaina tik ka·ahachim.
