SHILLONG: Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko so·otgipani bidingo inquiry-ko dakengon, a·dokni Director General of Police (DGP) R Chandranathan, chutti ra·na gita sorkario bi·engani gimin manderang bang·batan uni kamko chanchichipna gita a·bachengtokskaaha.
Re·anggipa August-ni 13 tariko HNLC-ni gitcham dilgipa Cheristerfield-ko police-rangni so·ote galani gimin a·dokni DGP-ko man·chape adita sak police officer-rangko kam dontongatchengchina Mawlai jolni dingtang dingtang dolrang dabitokengachim ine nikna man·a. Ia a·selni bidingo a·dok sorkari, judicial inquiry-ko dakchina ge·etahani gimin inquiry-ko jakgitele ka·na man·na gita ia police officer-rangko kam dontongatchengchina dabitokengachim.
Indake ong·engon, a·dokni DGP chutti ra·na gita dorgastoko galaha indiba da·o dipet uni dorgastoko man·sokujaengani gimin ua badita salrangna chutti ra·na bi·engachim, name ma·sikujaenga ine a·dokni Home Minister Lahkmen Rymbui parakataha.
Ia a·selni bidingo inquiry-ko Meghalaya Human Rights Commission (MHRC)-ni chairman-sa dilengani gimin, ia inquiry-o sorkaride mamingkoba dakna aro aganpana bil dongjawa ineba Home Minister parakataha.