Police officer-rangko kam dontongatchina dabianio soi ka·na jechaka ingipana Renikton talata

SHILLONG: Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko so·ote galanio jak donggipa police officer-rangko ra·galchina ‘Sur ki Nong Mawlai’ ba ‘Mawlai-o songdongenggipa manderangni ku·rang’ dolni dabienggipao soi ka·na jechaka ine songbadrango parakatani ja·man, iandake matnanganiko a·dokni Cabinet Minister Renikton Lyngdoh Tongkhar jegalatenba, police officer-rangko kam dontongatchina dabianio ua soi ka·na jechaka ong·jachim indiba iani bidingo MDA-o bakrimenggipa membor-rang baksa agangrikchengnasa miksongachim ine talataniko on·angaha.
HNLC bobil dolni gitcham dilgipa Cheristerfield Thangkhiew-ko so·otanio jak donggipa police officer-rangko kam ra·galchina dabie segipa chittio soi ka·china gita didie ‘Sur ki Nong Mawlai’ dolni dilgiparang, batanggimin salrango, Khasi aro Jaintia Hills a·jani sak 35 MLA-rangko grongahachim.
Indake ong·engon, ‘Sur ki Nong Mawlai’ dolni dabie segipa chittio ua soi ka·jawa ine songbadrango parakatani ja·man, ia dolni dilgiparang aro Mawlai jolo songdongenggipa manderang, a·dokni Cabinet minister Renikton Tongkhar-ko matnangna a·bachengtokskaahachim.
Iani bidingo talataniko on·angengon, ua police officer-rangko kam dontongatchina dabie segipa chittio soi ka·na jechaka ong·jachim indiba MDA-ni membor-skarang baksa agangrikchengnasa miksongachim ine Tongkhar parakatskaaha.
“MDA-o chinga pilakan kamrangko apsan ka·rimna nangani giminsa anga uamangko mande ra·bee mol·molahachim. Anga saksande maming kamrangko ka·na man·ja aro uni giminsa uamangko sengkuchina mol·molaha. Anga uamangni chittio soi ka·na jechaka ong·ja indiba anga iani bidingo chanchiengkua. Ia a·selko chinga nikjaenga ong·ja aro sorkarini gitaba judicial inquiry-ko kakketo matchotatna cholrangko sandienga,” ine Tongkhar aganaha.
Police officer-rangko kam ra·galningjaengani a·sel a·doko jingjengatanirangko nikangkuna nanggenma ine sing·on, sorkario bebera·china gita Tongkhar, manderangko mol·molataha.
“Uni gimin a·doko songdongenggipa manderang ma·sichakchina anga mol·molna ska. Sorkariba ia a·selni bidingo gisiko nangen kamko ka·engani gimin tom·tomaniko ra·bapilna gita pilakkon bakrime kam ka·china anga mol·molenga,” ine Tongkhar parakataha.