TURA: Re·anggipa Sombar saloni Budbar salona salgittamna ong·atanggipa Garo Hills Autonomous District Council (GHADC)-ni budget session-o dingtang dingtang kamrangni bidingo sing·anirangko dakna cholko on·jahani gimin aro an·tangko opposition dolrang baksa asongatahani gimin Tura-ni BJP MDC Bernard N Marak, GHADC-ni Chairman-o sing·doe sedoataha.
GHADC-ni Chairman Rakesh A Sangma-na sedoatgipa chittio Marak-ni parakatani gitade, uni budget session-na tarisogimin sing·anirangara Garo Hills-o songdongenggipa manderangni namgnina BJP-ni nangnikgipa sing·anirangsa ong·achim indiba session-ni somoio una ia sing·anirangko dakna cholko on·jahachim.
GHADC-ni budget session-ko ‘live’ mesokna gita cholko on·jahani giminba Tura-ni MDC, Chairman-o sing·doangaha.
“District council-o ong·enga obostarangko Garo Hills-ni manderangba nie nike aro ma·sie ra·pana bil dongachim,” ine Marak parakataha.
Uni tarisamsogipa sing·anirangna cholko on·gija budget session-ko Budbar attamchibara matchotataiahani giminba Marak, Chairman-ni kamo suk ong·gijaniko parakataha.
“Maini gimin sing·anirangnade somoiko kontasasan on·aiaha? Ia sing·anirangara manderangna nangchongmotgipa kamrangni giminsa ong·achim,” ine Tura-ni MDC parakataha.
Budget session-ni somoio opposition dolrang baksa asongatahani giminba talataniko on·china Tura-ni MDC, GHADC-ni Chairman-ko didiangaha.
