SHILLONG: Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko so·otanio jak donggipa police officer-rangko kam dontongatchengchina dingtang dingtang dolrang dabitokengon, name am·sandichenggijade darangkoba kam dontongatna ba uni kosako ja·kuko de·na man·jawa ine a·dokni Chief Minister Conrad K Sangma parakataha.
“Ia a·selni bidingo judicial inquiry-ko dakna ge·etmanaha aro ia inquiry-ko matchotgija saniba kosako ja·kuko de·genchimode uan kragijani ong·gen. Inquiry-ko matchotahaon sawa dos donga an·ching ma·sina man·aigen,” ine Chief Minister, kobor ra·timgiparangna parakataha.
Police officer-rangko kam dontongatchengchina dabienggipa dolrangko chakchike sengkuchina gitaba ua didiataha.
Dos donggipa manderangni kosako rakgipa ja·kurangko de·gen ine Home Minister Lahkmen Rymbui-ni agangimin kattarangko janapatengon, inquiry report-o pangchake sorkari pilak kamrangko kakketo ka·angaigen ine Sangma parakataha.
“Chinga a·bachengonin inquiry matchotesa nanga gita ja·kurangko de·gen ine aganmanaha. Inquiry report-ko nichengesa ia mandeko so·otanio sawarang jak donga ukode ma·sina man·gen,” ine Chief Minister aganaha.
Mawlai jolo donggipa dol 11 NGO-rangni nangrime bikotgipa ‘Ka Sur Ki Nong Mawlai’, HNLC-ni gitcham dilgipa Cheristerfield Thangkhiew-ko so·otanina, a·dokni DGP R Chandranathan, East Jaintia Hills-ni SP Jagpal Singh Dhanoa aeo SP (Traffic) Shailendra Bamaniya-ko kam dontongatchina dabiengachim ine nikna man·a.
