AMPATI: India a·songni gipin biaprango gitan South West Garo Hills a·jaoba Poshan Maah ba Nutrition Month manianiko Bristibar sal dipet Betasing jolo donggipa Batazor AWC-o a·bachengataha aro ia manianiko a·bachengatani somoio South West Garo Hills a·jani Deputy Commissioner Ch Ramakrishna, Tura ICDS (C)-ni DPO CD Arengh, District Horticulture Officer PK Medhi, Medical & Health Officer Dr Mikrak D Sangma, ICDS Project Betasing-ni CDPO aro Ampati-ni DSWO I/c ZR Marak, ICDS Project Zikzak-ni CDPO TK Marak, district aro block coordinator-rang, supervisor-rang aro Anganwadi worker-rangba dongpae bak ra·angaha.
Ia Poshan Maah-ko a·bachengate on·angani somoio South West Garo Hills a·jani Deputy Commissioner Ch Ramakrishna, jinmana aganprakangengon, an·o donggipa me·chikrang, sok kanenggipa me·chikrang aro bi·sarangna namgipa cha·ani ringanirangko on·ani bidingo ma·siate on·na miksonganio ia Poshan Maah-ko a·song gimikon manienga aro ia program-ko a·bachengatanichi an·o donggipa me·chikrangni aro bi·sa bakgitchakrangni sianirangko komiatna dakchakani ong·gen ine parakangaha.
Ia program-ko ong·atanio Deputy Commissioner-ni jakchi, an·o donggipa aro sok kanenggipa me·chikrangna dingtang dingtang me·su bitchilrangko suale on·angan baksana Poshan Vatika-ni bak gita noktangtango me·su bagan dakchina didina gita dakmesokanioba bak ra·angaha. An·tangtangko an·seng baljoke rakkina gita pangnan namgipa cha·anirangko cha·china, rongtala chiko ringchina aro jakrangko jaksujringchina gitaba DC manderangko didiangaha.
COVID-19-ni tikako su·kugijagipa manderangkoba ia kenbegnigipa sabisioni naljokna man·na gita tikako su·e ra·china ua didiangaha.
Bilsiantian Poshan Abhiyan ba National Nutrition Mission-ni ning·o ia Poshan Maah ba Nutrition Month-ko September jao manirongenga ine nikna man·a.
South West Garo Hills a·jao ia Poshan Maah manianiko a·bachengatanio dongpae jinmana aganprakanggipa manderangara, Tura ICDS Cell-ni DPO CD Arengh, Ampati-ni District Horticulture Officer PK Medhi, Ampati-ni Medical Officer Dr Mikrak Sangma aro gipinrang ong·a.
