SHILLONG: HNLC bobil dolni gitcham dilgipa Cheristerfield Thangkhiew-ko so·otanio jak donggipa police officer-rangko kam dontongatchina dabianirang bilakbatrorobaengon, ia a·selni bidingo judicial inquiry matchotkujaskalde sorkari, police officer-rangni kosako maming ja·kurangko de·na man·kujawa ine a·dokni Chief Minister Conrad K Sangma parakattaiskaaha.
HNLC bobil dolni gitcham dilgipako so·otanio jak donggipa police officer-rangko kam dontongatchina dabianiko bilakbatate Sukrobar pringoba dingtang dingtang dolrangni nangrime bikotgipa ‘Ka Sur ki Nong Mawlai’ dolni dilgiparang, Main Secretariat-ona re·ange Secretariat gate mikkango churirangko galetokahachim.
Secretariat mikkango ia dolni jingjengatgipani bidingo janapatengon, iani bidingo ua an·tangde mamingkoba aganna nangani dongjawa indiba niamsa nanga gita kamko ka·gen ine Chief Minister parakataha.
“A·songo mai niamrangko donmanahachim, ua gitan niamde ja·kuko de·aigen,” ine Sangma aganaha.
Police officer-rangko kam ra·galchina dabianirang bilakbatrorobaengani gimin sing·on, iani bidingo ua a·bachengon aganmanaha aro ua gitan ua ja·kuko de·anggen ine Chief Minister parakataha.
“Ia a·sel bidingo judicial inquiry-ko dakengaha aro judicial inquiry matchotkujaskalde maming ja·kurangko de·na man·kujawa. Inquiry matchotahaon, report-o pangchake chinga ja·kurangko de·anggen,” ine Sangma aganaha.
Jegalenggipa dolrang baksa agangrikgenma ine sing·on, iani bidingo sorkari nichengna nanggen indiba da·o dipet iani bidingo chanchia dongkuja ine Chief Minister parakataha.
Inquiry matchotjaskalde police officer-rangni kosako ja·ku de·jawa: CM agantaia
Date:
Share post:
