SHILLONG: Meghalaya Energy Corporation Limited (MeECL)-o smart meter project-na Asian Development Bank (ADB)-ni dakchake on·gipa USD million 132.8-ko jakkalsretaha ine matnangenba, iani bidingo FIR-ko ka·china gita Opposition dolni dilgipa Mukul Sangma, ADB aro gipin official-rangko didiangaha.
Iani bidingo kobor ra·timgiparang baksa agangrikengon, ia kamko jakkalsretgipa manderangni kosako a·songo dongimin niamrango pangchake mokordoma ka·enba rakgipa ja·kurangko de·na nanga ine Dr Sangma parakataha.
Smart meter project-ko jakkalsretanio biming man·pajana gita ADB, ja·kurangko de·e mesokna nanga ineba Sangma aganaha.
“Ia kamni bidingo FIR-ko ka·ahaon, tangka jakkalsretaniko aro ong·gija dakanirangko jakgitelgipa agency-rang jako ra·e am·sandiangna man·gen. Ia kamrangni bidingo independent agency-rangni am·sandianirango bil donggipa manderang, mamingkoba dakna man·jana nanga,” ine Opposition dolni dilgipa aro a·dokni gitcham chief minister aganaha.
Sangma-ni parakatani gitade, MeECL-o dingtang dingtang program-rangko jakkalsretani aro ong·gija dakanirangko pangnan manderang songbadrango niksona man·engachim.
“Ian mingsa minggni project-rangni giminsan ong·ja indiba MeECL-o dingtang dingtang project-rangni giminba apsan dake matnanganirangko nikna man·enga. Songbadrango changni chang iandake matnanganirangko niksoengani gimin ia a·selrangni bidingo ning·tue sandianirangko dakna nangchongmotenga ine nikna man·a,” ine Sangma parakataha.
Koborko on·ani gitade, a·doko Saubhagya scheme-ni kamko ka·na contract-ko man·gipa Delhi-ni Satnam Global Infraproject, apsan company-an da·o ADB-ni dakchake on·enggipa smart metre project-ni kamkoba man·taiahachim.
Ia project-ni work order-ko on·ani ja·man smart metre ge·sakoba chate on·kujaengon, ia company-na MeECL-ni official saksa, tol·e tarigipa completion ba matchotani certificate-ko on·skaahachim ine kobor on·aha.