SHILLONG: Chinao tarigipa smart meter-rangko ra·bana gita dolsa Chinese company baksa tik ka·grikani bidingo MeECL changasatai da·oba minggipin ja·gipuaniona sokbataiaha.
Indakeba nikatna gita man·a je Power department-ni Secretary, Pravin Bakshi-ba iani mamlako jako ra·aha.
ADB project aro China-oniko smart meter-ko niamgri ra·baani gimin ma·talataniko on·china gita Bakshi, re·anggipa April 19 tarikon MeECL-ni gitcham CMD, Arun Kembhavi-na lekka seatahachim.
“ADB Smart Meter project-ni bidingo Satnam Global Infra Projects Ltd. aro JPM Industries Ltd. and Inhemeter Co. Ltd-na LOA-ko on·ani bidingo sing·anirang bang·eng nakatenga, iako nang·na u·iatenga” ine Power department-ni Secretary-ni seatgipa chittio janapatahachim.
Bakshi-ni aganani gitade, Inhemeter Co. Ltd. ian dolsa Chinese Company ong·a, aro China baksa an·pagipa biap meligrikgijanirang ong·ani gimin, India a·songni naljokaniko rakkina gita re·anggipa July, 2020 bilsio India Sorkari General Financial Rules, 2017-ko taridapaha, jeon songsul a·songoniko bosturangko badingbaaniko champengatahachim.
“Unaskango indakgipa apsan a·selni giminan, India Sorkarini Department for Promotion of Industry and Internal Trade (Public Procurement Section), Ministry of Commerce aro Industry, bading chiwalani champengatani gimin adita sing·anirangko nakatatahachim” ineba ua aganaha.
Energy Efficiency Services Ltd. (ESSL), Chinese meter-rangko ra·bajawa, maina iade electricity distribution network baksa connect ka·giminsa ong·a, jean namgijani donga ingipa koborrangko mediaoniko nikaha ineba Bakshi aganaha.
Saksa a·gipi official-ni aganani gitade, “EESL, ia a·selrangko janapenbaChinese smart meter-rangko ra·bana jechakaha”.
EESL, ian dolsa NTPC Ltd, Rural Electrification Corporation (REC) aro Power Finance Corporation (PFC) aro Power Grid Corporation of India Limited baksa bakrime kam ka·enggipa ong·a.
