TURA: Raksamgre Sub-Division Welfare Committee, jolo donggipa NGO-rang jekai, GSU aro AYC dolrang baksa, Raksamgre sub-division-ko da·o mikkangchi gitalgipa district songna manchienggipa Dadenggre District, jenan Dadenggre District Demand Committee aro NPP Dadenggre Block Committee-rang gita kingkot dabie chu·sokaniko niknasiengachim, ua district-o chapatna nangnikgijaniko parakaha.
Raksamgre Sub-Division Welfare Committee-ni gita, a·jao gitalgipa district-ko man·baengani gimin NPP Block Committee aro District Demand Committee-rangna chakpaaniko aro mikkangchina nama skaniko on·atengon, Raksamgre Civil Sub-Division-ko West garo Hills-ni skotong songjinma Tura-an sepangbatani gimin, mikkangchi district gital songnasienggipa Dadenggre district-o chapatjachina didiatskaaha.
Raksamgre Sub-Division Welfare Committee-ara Nokmas, Gaonbura aro Mondolini dilgiparangko man·chape bang·bea NGO-rang, jekai GSU, FKJGP, ASWA, AYC, GSMC, AIGU, AHAM dolrangchi nangrimgimin ong·a aro uamang gimikan, Raksamgre sub division-ko Dadenggre district-o chapatenganiko nangniktokja ineba koborna u·iataha.
Committee-ni dilgiparangni parakani gitade, nangrimgimin NGO aro jolo donggipa manderangni adita salrangna skango Raksamgre, Tikrikilla aro Pedaldoba jolrango iani bidingo apsan tom·e chanchirimanio gimikan mikkangchi district songnasienggipa Dadenggre-o Raksamgre sub division-ko chapataniko nangniktokjaha.
“Chinga, uamangni dabianina chake, uamangni mikkangchi gitalgipa district-ko man·gnina nama skaniko on·pana nangnikbea, indiba chingni Raksamgre civil sub division-ko West Garo Hills District-ni ning·on ga·akatskakuchina ine chinga dabienga,” ineba committee-ni dilgiparang mol·molataha.
