AMPATI: South West Garo Hills a·jao electoral roll-rangko Special Intensive Revision (SIR) ka·ani bak gita gimik king 76,678 enumeration form-rangko sualataha.
SIR-ko ka·ani bak gita a·dokni pilak biaprangon Booth Level Officer (BLO)-rang, re·anggipa June 30 tarikonin, nokantichi re·e, enumeration form-rangko sualna a·bachengaha aro uandaken South West Garo Hills a·jaoba BLO-rang, Sonibar attamni 5:00 bajiona kingking gimik king 76,678 enumeration form-rangko sualna man·aha.
Official-rangni u·iatani gitade, ia king 76,678 enumeration form-rangko BLO-rang, South West Garo Hills a·jani Assembly constituency damgittam, chong·motan 53-Ampati (ST), 54-Mahendraganj (ST) aro 55-Salmanpara (ST) Assembly constituency-rango sualna man·aha aro ia king 76,678 form-rangoni Ampati constituency-o king 23,004, Mahendraganj constituency-o king 26,011 aro Salmanpara constituency-o king 27,663 enumeration form-rangko sualna man·aha.
King 1357 enumeration form-rangkode digitize ka·aha aro ian chu·gimik sualgimin form-rangoni 1.25% ong·aha ine u·iatengon, da·o dipet king 21 (0.02%) form-rangko online gita submit ka·aha ine official-rang parakataha.
BLO-rangni nokprakprakonaa re·e electoral roll-rangko nipilanio, sak 4 elector-rangde siaha sak 3-de gipin biapona apjitkamaha ine ma·sina man·aha.
Indake ong·engon, South West Garo Hills a·jao jakgitelgipa aro namgipa electoral roll-rangko tarina man·na gita rakbee kamrangko ka·engani gimin Deputy Commissioner (Election) Office, dingtangmancha BLO-rangko, election official-rangko aro a·jao songdongenggipa mande sakantikon mittelpilataha.
